Loveparade

D Loveparade (au Love Parade oder Love-Parade gschribe) isch e Technoparade gsi, wu alljohr durgfiert woren isch. Mit rund zwelf Millione Bsuecher syt ihre Grindig isch si di grescht Danzveraastaltig vu dr Wält gsi. Vu 1989 bis 2006 het si z Berlin stattgfunde, in dr Johre 2007, 2008 un 2010 in verschidene Stedt im Ruhrgebiet. 2004, 2005 un 2009 isch d Parade uusgfalle. Bi dr 19. Loveparade am 24. Juli 2010 z Duisburg isch s im Yygangsberaich zuen eme Uuglick un ere Massepanik chuu, wu s 21 Dodesopfer derbyy gee het, 511 Lyt sin zem Deil schwär verletzt wore. Dää Vorfall het international Bedroffeheit uusglest un isch wältwyt in dr Medie bhandlet wore. Dr Organisator vu dr Loveparade 2010, dr Unternämmer Rainer Schaller, het am Dag no dr Katastrof mitdeilt, ass es zuechimftig kei Loveparade me git in dr bishärige Form.